Manoli Türküsü
On iki kardaş bir monastır çekettirmiş
Gündüz işlärmişlär, gece göçärmiş,
Manoli, Manol Manastori
Kardaşlarına bölä da demiş:
— Ya geliniz kardaşlar bırayı,
Bän ne söylecäm kayıl olcanız mı?
Hepsi de bir aazdan barmış:
—Biz senin lafına kayılız.
—Akşama evä gidceyniz
Gelinnerinizä sımarlayasınız
Yarına da manastıra gelsinnär
Ne Allaa verdiysä imää getirsinnär.
Hepsi de bir azdan barmış,
Her sölärsäk, demiş, bırda kalalım
Mermer taşı da olalım.
Avşam olêêr, gün de kauşêr
On bir kardaş evinä daalışêr.
Manoli, Manol, Manastori,
Hepsinin pençerlerindä sesler
Hepsi de gelinnerinä söler.
Hem kaval çalêr, hem de alayer.
Tudorkasına bölä da der:
— Tudorka, gelinim Tudorka,
Bän çalacam, sän da oynaycan,
Bekim senin bitki oyunnarın.
Yarına da erken kalkasın,
Ne Allaa verdiysä imää yapasın,
İvançucuu suya koyasın,
Manastıra da getiräsin,
Gelinnerä “hadi” edäsin.
—Haydiyin manastıra gidelim!
Hepsi da ölä da demiş,
—Ha sän git, biz da gideciz.
Tudorka yola yollanmış,
Manoli da betvaya düşmüş:
— Ver Allahım, demiş, bir de büyük yaamur,
Tudorkanın mancalarını doldur.
Tudorka geri de dönsün.
Tudorka geri de dönmemiş,
Fıtacıını çözmüş, mancaları örtmüş,
Tudorka hep ileri gitmiş.
Manoli, Manol Manastori
Gene de duaya düşmüş:
— Ver Allahım, demiş, bir de büyük yılan,
Tudorkanın önünä çıksın.
Allaa verer bir de büük yılan.
Yoldan sapêr, ileri gider
Etişmiş manastıra da
— Kolay gelä, demiş, Manol, Manastori!
— Allaa raz olsun, gelinim Tudorka.
Hiç mi bulmadın bir çırak çoban
Mancalarını, demiş, veräsin
Kendin de geeri dönäsin,
Kendin de geeri dönäsin?
— Manoli, be, Manoli, demiş,
Neçin benim mancalarımı beenmedin?
— Tudorka, mari Tudorka,
Benim altın üzüm manastırın
Temelinä düştü.
—Ya, demiş, atlayıp çıkarayım.
Tudorka atlamış çıkarmaa
On iki kardaş dolaya almış,
Hem aalarmış, hem de baarmış.
— Manol be, Manoli, demiş,
Şaka mı sanêrsın, osa gerçek mi?
İvançuyu kimlär yıkaycek?
— Yayan yaamurlar yıkaycêk,
Havada uçan kuşlar doyuracêk,
Esen lüzgärlar da sallaycêk,
İvançu da ölä büüyecek.
Tudorka orda da kalêr
On iki kardaş da mermer taşı olêr
(Sarsaman 2005).
file:///C:/Users/USER/Downloads/316-Qaqauz_(Qaqavuz)_Yerinde_Qadin_(Irina_Iusiumbeli)_(Ankara-2008).pdf
